Latest News

सांगली : नंदादीप मेडिकल केअर फाउंडेशन आणि नंदादीप फॅको ट्रेनिंग इन्स्टिट्यूट यांच्या संयुक्त विद्यमाने आयोजित PhacoTips 6.0 या आंतरराष्ट्रीय नेत्रपरिषदेत देश-विदेशातील नेत्रतज्ज्ञ, मोतीबिंदू शस्त्रक्रिया तज्ज्ञ, प्रशिक्षक आणि युवा नेत्रचिकित्सक मोठ्या संख्येने सहभागी झाले. आधुनिक नेत्रचिकित्सेतील नव्या तंत्रज्ञानाची देवाणघेवाण, कौशल्यविकास आणि संशोधनाला चालना देण्याच्या उद्देशाने ही परिषद आयोजित करण्यात आली होती.

परिषदेत मोतीबिंदू शस्त्रक्रियेतील अत्याधुनिक तंत्रज्ञान, फॅकोइमल्सिफिकेशन (Phaco) शस्त्रक्रियेतील नाविन्यपूर्ण पद्धती, गुंतागुंतीच्या शस्त्रक्रियांचे व्यवस्थापन आणि क्लिनिकल अनुभव यावर विविध तज्ज्ञांनी मार्गदर्शन केले. प्रात्यक्षिक शस्त्रक्रिया, शैक्षणिक सत्रे आणि चर्चासत्रांमुळे सहभागी डॉक्टरांना आधुनिक उपचारपद्धतींबाबत अद्ययावत माहिती मिळाली.

या परिषदेचे विशेष आकर्षण ठरले ते ‘अँगल अल्फा पॅटवर्धन अॅप’ आणि PhacoTips.com या डिजिटल शैक्षणिक व्यासपीठाचे लोकार्पण. नेत्रतज्ज्ञांना मोतीबिंदू शस्त्रक्रियेचे नियोजन अधिक अचूकपणे करता यावे, तसेच आधुनिक डिजिटल तंत्रज्ञानाचा प्रभावी वापर करून शिक्षण आणि क्लिनिकल निर्णय प्रक्रिया अधिक सक्षम व्हावी, या उद्देशाने या उपक्रमांची निर्मिती करण्यात आली आहे.

परिषदेत अमेरिका, ब्राझील, बेल्जियम, मेक्सिकोसह विविध देशांतील तज्ज्ञांनी सहभाग घेत अनुभव आणि संशोधनाची देवाणघेवाण केली. नंदादीप आय हॉस्पिटलचे संस्थापक डॉ. दिलीप पटवर्धन, संचालक डॉ. सौरभ पटवर्धन आणि डॉ. निधी पटवर्धन यांच्या मार्गदर्शनाखाली आयोजित या परिषदेमुळे आधुनिक नेत्रशिक्षण, संशोधन आणि कौशल्यविकासाला नवी चालना मिळाली. भविष्यातही अशाच आंतरराष्ट्रीय शैक्षणिक उपक्रमांद्वारे जागतिक दर्जाचे नेत्रशिक्षण आणि गुणवत्तापूर्ण रुग्णसेवा अधिक बळकट करण्याचा नंदादीपचा संकल्प यावेळी व्यक्त करण्यात आला.